යළි එන්න

සඳ දෑත් දිගුකොට

දියරැළි පිරිමදින 
මේ මිහිරිතම රැයේ
මිහිර මා වෙත එන්න
රැගෙන අප පෙර මතක

කොඳ මල් මකරන්ද තැවරූ පිණි
මුදුව දෙකොපුල් සිඹින
මේ සුසුවඳ රැයේ
මිහිර මා වෙත එන්න
කඳුලක රැඳී නෙතු මත

කන්කලු මියුරු මියැසිය
පෙම්වත් රෑසියන් ගයනා
මේ අමයුරු රැයේ
මිහිර මා වෙත එන්න
විරහා ගී සරයෙක

නඳුන් උයනෙහි සිරි අසිරි
මැවෙද්දී ලකල් තුසිතය
මේ සිහින රාත්‍රියේ
මිහිර මා වෙත එන්න
මා වෙතින් රැගෙන ගිය
ජීවිතය ගෙන එන්න

සමන්මලී අභයසිරි